Соли сипаригардида ба 220 000 оила аз табақаҳои осебпазири аҳолии Точикистон дар маҷмуъ 116 млн 178 ҳазору 464 сомонӣ кумак расонида шуд. Дар ин хусус сардори шуъбаи таҳлили сиёсати ҳифзи иҷтимоӣ ва кафолатҳои иҷтимоии давлатии Вазорати тандурустӣ ва ҳифзи иҷтимоии аҳолии ҷумҳурӣ Соима Муҳаббатова зимни баргузории маҳфили «Тавозун» иттилоъ дод.
Дар маҳфили иқтисодии «Тавозун», ки 28 феврал дар Китобхонаи миллии Тоҷикистон доир гашт, беш аз 30 намояндаи вазорату идораҳои давлатӣ, ниҳодҳои байналмилалӣ ва рӯзноманигорон мавзӯи механизми таъйин ва пардохти кумакҳои унвонии иҷтимоӣ (КУИ) дар Тоҷикистонро баррасӣ намуданд.
Номзади илмҳои иқтисодӣ ва корманди Институти иқтисодиёт ва демография Академияи илмҳои Тоҷикистон Фарида Муминова дар робита ба яке аз бахшҳои асосии Стратегияи миллии рушд барои давраи то соли 2030 – бахши ҳифзи иҷтимоӣ баён дошт, ки ҳадафи стратегии мамлакат баланд бардоштани сатҳи зиндагии мардум дар пояи таъмини рушди устувори иқтисодӣ ба ҳисоб меравад.
Ба гуфтаи мавсуф, яке аз ҳадафҳои Стратегияи миллии рушд -2030- ин фаро гирифтани ҳамаи минтақаҳои мамлакат бо кумакҳои унвонии иҷтимоӣ буд, ки аллакай пурра амалӣ гардид. Ҳоло он дар 68 шаҳру навоҳии мамлакат амалӣ мегардад.
Таъкид гардид, ки стратегияи миллӣ дар се марҳила амалӣ карда мешавад. Марҳалаи аввал- ин давраи гузариш ба модели нави рушди иқтисодӣ дар мамлакат, давраи дувум- марҳилаи рушди суръатнок, ки ба ҷалби сармоягузориҳо асос ёфтааст ва давраи сеюм- марҳилаи ба анҷом расонидани саноатикунонии босуръат ва ташаккули иқтидорҳо барои рушд дар асоси дониш ва навовариҳо мебошад. Барои татбиқи ин марҳилаҳо барномаҳои махсуси алоҳида қабул гардидаанд.
Иттилоъ дода шуд, ки аз рўи сенарияи дурнамосозӣ агар соли 2022 андозаи кумакпулӣ 512 сомониро ташкил медод, пас соли 2025 андозаи он то ба 1406 сомонӣ ё зиёда аз он баланд бардошта мешавад.
Тавре қаблан АМИТ «Ховар» хабар дода буд, соли 2022 ба зиёда аз 240 ҳазор нафақагирон ба маблағи 144, 2 миллион сомонӣ аз ҳисоби маблағҳои буҷети ҷумҳуриявӣ кумаки яквақта пардохт карда шуд. Дар ин хусус зимни нишасти матбуотӣ Директори Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон Дилмурод Давлатзода иттилоъ дод.
«Маблағи мазкур бо мақсади иҷрои Қарори Ҳукумати Ҷумҳурии Тоҷикистон аз 9 декабри соли 2022 «Дар бораи пардохти кумаки яквақта ба гурӯҳҳои осебпазири аҳолӣ» ба нафақагирони гурӯҳҳои осебпазир, аз ҷумла гирандагони нафақаи иҷтимоӣ, маъюбон, кӯдакони ятим ва бе саробон расонида шуд»,-иброз дошт директори агентӣ.
Шаҳлои САДРИДДИН,
АМИТ «Ховар»