Дар Душанбе даври ҷумҳуриявии Фестивали атласу адрас ва намоиш — фурӯши он баргузор гардид, ки дар он муовини Сарвазири Ҷумҳурии Тоҷикистон Матлубахон Сатториён, инчунин намояндагони мақомоти давлатӣ, корпуси дипломатии муқими шаҳри Душанбе ва ҳунармандони моҳир аз шаҳру навоҳии мамлакат иштирок намуданд. Дар ин хусус ба АМИТ «Ховар» дар Вазорати саноат ва технологияҳои нави Ҷумҳурии Тоҷикистон хабар доданд.
Иштирокдорон, сайёҳон ва сокинони пойтахт аз намоиши ҳунарҳои мардумӣ, растаҳои атласу адрасбофӣ дидан намуда, инчунин аз тамошои барномаҳои фарҳангиву фароғатӣ болидаруҳ гардиданд.
Дар даври ҷумҳуриявии Фестивали атласу адрас ва намоиш- фурӯши он ҳунармандони моҳири вилоятҳои Суғду Хатлон, ноҳияҳои тобеи ҷумҳурӣ ва шаҳри Душанбе иштирок намуда, намунаҳои гуногуни матоъҳо, либосҳои миллӣ ва ҳамёну сумкаҳои аз атласу адрас омодагаштаро пешниҳоди тамошобинон гардониданд.
Намоиши либосҳои миллии аз матои атласу адрас, ки аз ҷониби тарроҳон омода гардида буд, ба чорабинӣ ҳусни дигар зам намуд.
Дар фарҷоми чорабинӣ шахсони ташаббускору фаъол бо «Диплом», «Ифтихорнома» ва «Сипоснома»-ҳову дигар туҳфаҳо қадрдонӣ гардиданд.
Бояд гуфт, ки масъулини баргузории ин Фестивал вазоратҳои саноат ва технологияҳои нав, фарҳанг, кумитаҳои кор бо занон ва оила, рушди сайёҳӣ, телевизион ва радио, кор бо ҷавонон ва варзиш, Палатаи савдо ва саноат, Иттифоқи ҳунармандон, Иттифоқи «Тоҷикматлубот», мақомоти иҷроияи ҳокимияти давлатии вилоятҳо ва шаҳру ноҳияҳои мамлакат мебошанд.
Ҳадафи Фестивал ташвиқу тарғиби матои атласу адрас ва муаррифии имкониятҳои ресандагиву бофандагии мамлакат маҳсуб ёфта, шартҳои асосии Фестивал ин роҳандозии ҳамкории эҷодӣ ва истеҳсолӣ байни тарроҳон ва истеҳсолкунандагони матоъҳои ватанӣ арзёбӣ мешавад.
Ҳамзамон Фестивали мазкур ба тарбияи ҳисси зебоипарастӣ, тарғибу ташвиқи фарҳанги матои миллӣ, эҳёи ҳунарҳои мардумӣ, арҷгузорӣ ба меҳнати ҳунармандон, муаррифии навъҳои гуногуни атласу адраси истеҳсолшуда, муайян намудани истеъдодҳои нав ва чирадастони моҳир мусоидат менамояд.
Имрӯзҳо дар корхонаи «Атласи Хуҷанд», зиёда аз 50 намуди атлас ва 30 намуди адрас истеҳсол мешавад, ки машҳуртарини онҳо бо номҳои «Баҳори Тоҷикистон», «Ҷавонӣ», «Туҳфа», «Тӯёна», «Муҳаббат», «Тирукамон», «Гулханд», «Хосиятхон» ва дигарҳо номгузорӣ шудаанд.
Атласу адрас маҳсули меҳнати дастӣ, чун воситаи муҳими эстетикию ороишӣ, зебоипарастӣ ва завқи бадеии мардум бо зиндагӣ робитаи ногусастанӣ дорад.
Мардуми тоҷик дар Шоҳроҳи Абрешим аз Шарқ то ба Ғарб дар давоми ҳазорсолаҳо бо матоъҳои атласу адраси худ маъруф буд. Матоъҳои нафису тааҷубовар ва нақшу нигор намудаи миллати тоҷик дар бозорҳои мамолики Шарқу Ғарб серхаридор буданд.
Тарзи тайёр ва истеҳсоли матоъҳои атласу адрас басо куҳан буда, пайдоиши ин матоъҳо аз анъанаҳои бофандагии халқи тоҷик сарчашма мегирад.
Матоъҳои атласу адрас рангаю сернақшу нигор буда, аз рӯзи пайдоиш то замони муосир мавқеи хоси худро гум накардаанд ва дар байни газворҳои дигар матои атлас ҳамчун «шоҳи матоъҳо» эътироф гардидааст.
Ёдовар мешавем, ки ҳамасола дар ҷумҳурӣ якшанбеи дуюми моҳи июн дар пойтахти мамлакат – шаҳри Душанбе баргузории Фестивали ҷумҳуриявии атласу адрас ва намоишу фурӯши он ба нақша гирифта шудааст.